Monday, June 16, 2014

സ്വപ്നങ്ങൾക്ക് പ്രവേശനമില്ല





ലോക 
കാൽപന്തു മാമാങ്കത്തിൽ
ഭാരതം പന്തുരുട്ടുന്നത്,

ത്രിവർണ്ണ പതാക  
ചന്തം വിരിയിക്കുന്നത്,
എന്റെ ദേശം മുഴുവൻ
ആനന്ദനൃത്തം ചവിട്ടുന്നത്...
കണ്ടു മുഴുമിക്കും മുമ്പേ,
മുറിഞ്ഞ സ്വപ്നത്തിന്റെ 
ഉറക്കച്ചടവിൽ
ചാനൽ വെട്ടത്തിലേക്ക് 
കണ്ണ് തുറന്നു.
പ്രതീക്ഷയുടെ 
കളിമൈതാനങ്ങളിൽ 
അന്യദേശത്തിന്റെ നിറങ്ങൾ
ദേഹം നിറയെ വാരിയണിഞ്ഞു
യുവത ആർത്തലയ്ക്കുന്നത്‌
കണ്ടു കണ്ടങ്ങനെ...

പിന്നെ, നിറം കെട്ട
വാർത്തകളിൽ 
നാട് വെന്തുരുകുന്നത്.
മാനം കീറിയ പെണ്‍ജന്മം 
മരക്കൈകളിൽ തൂങ്ങിയാടുന്നത്..

സ്വപ്നങ്ങൾക്ക് 
പ്രവേശനമില്ലെന്ന 
ബോർഡെഴുതി വെച്ച്
പിന്നെയും കണ്ണ് മൂടുമ്പോൾ
വാർത്താ മുനമ്പിൽ 
ഫ്ളാഷ് ന്യൂസായി 
കറുത്ത ചിത്രങ്ങൾ 
തെളിഞ്ഞു തെളിഞ്ഞങ്ങനെ...???

***********************************************************************
                                                                                                              (ചിത്രം കടപ്പാട്: ഗൂഗിൾ)

1 comment:

  1. നല്ല സ്വപ്നം കാണാന്‍ പോലും അര്‍ഹതയില്ലാത്തവര്‍ നാം

    ReplyDelete